SUN搞作：少膽虫手記：手起刀落
「少膽虫，若要成功，必先……為咗壹全霉節流大計，惟有難為你！」淫賤黎把玩手上利刃，寒光乍現，少膽虫不禁哆嗦。「腦細，兩者有乜嘢關係？」可惜少膽虫詢問被無視。磨刀霍霍，少膽虫心跳加速，淫賤黎大吼一聲︰「手起刀落！」
少膽虫雙眼緊閉，腦海中浮現嘅只有蒼井空，「兄弟，再見喇，多謝你令我度過無數白色聖誕。」千言萬語，只可在心中訣別。「咔嚓」，有物件應聲一分為二，少膽虫難以再忍，「我唔要做李連英咁唯命是從！」
「你講乜嘢？你一世都係我嘅奴才！嘻嘻。」少膽虫聽到淫賤黎嘲笑，緩緩睜眼，只見枱上《爛果》斷成兩截。「以後《爛果》都淨係出一半，但價錢照舊，慳得幾多得幾多！」淫賤黎道。「出一半？咁咪人手都可以減半，我會唔會……」少膽虫愈諗愈驚，「腦細，咁做唔得嘅。」
「唔得？《武媚娘》cut剩個頭都可以出街；啞視新聞大斬都可以照做，你同我講唔得？」淫賤黎咆哮。睇嚟呢鋪，少膽虫都有排煩……
