政壇：搞搞政：阿毛盲撐肥佬黎 建制批收錢做嘢
壹傳媒集團前主席黎智英（肥佬黎）被指係佔領行動幕後「黑手」兼泛民主派「金主」，佢位於何文田嘅大宅同將軍澳壹傳媒集團總部，喺周一凌晨被人合共投擲三個燃燒彈。尋日公民黨立法會議員毛孟靜（阿毛）就急撲出嚟，佢曾被指收過肥佬黎五十萬元但又否認，今次就一口咬定件事同新聞自由有關，仲話香港「恐怖」多，動議要喺立法會大會休會辯論事件。雖然建制派話事實印證肥佬黎係泛民金主，但就怕被人批評佢哋唔關心新聞自由而通過動議，認真荒謬。
設計圖片及對白
提休會辯論惹質疑
阿毛尋日喺立法會內務委員會動議喺下周三大會提出休會辯論，佢繪影繪聲話「深夜恐嚇、教訓味道甚濃」，令人聯想到同新聞自由有關，甚至同政治有關；又話香港有好多恐怖，有白色恐怖同黑色恐怖，隨時有埋紅色恐怖咁話，仲形容事件拍得住巴黎恐襲喎。建制派議員質疑，阿毛盛傳收過肥佬黎錢，而肥佬黎亦公開講過曾向阿毛及黨友陳淑莊、民主黨涂謹申各人畀咗五十萬元，質疑阿毛係「收錢做嘢，公器私用」，應該要向立法會申報個人利益。樹根仲話，肥佬黎嘅集團喺台灣又好、香港又好，財政都唔多穩健，而且肥佬黎自己又同社團人物過從甚密，認為事件唔似同新聞自由有關囉。
議員陳恒鑌就揶揄，收買政客喺立法會講嘢就並非香港嘅核心價值喇。阿毛聽到兩人咁講當堂起晒弶，又話人哋抹黑佢，仲話立法會議員個人利益監察委員會主席葉國謙已經通知咗佢，認為對佢收錢嘅指控唔成立，已經唔再追究。
