政壇：馬斐森擦政府鞋補鑊
政府日前發表施政報告，香港大學校長馬斐森翌日就喺本地英文報章撰文，話非常歡迎特首梁振英持續關注青年發展，又話政府研究增加資助醫科、牙科同其他醫療專科學額嘅做法獲得學界支持。本身係港大法律系副教授嘅「佔領中環」發起人戴耀廷一直被批評教唆學生參與佔領、收受神秘捐款同頻頻休假，但未見校方對戴採取任何實質行動，外界紛紛質疑馬斐森包庇戴耀廷。今次馬斐森大讚施政報告，莫非係想為放生戴耀廷補鑊？
馬斐森日前喺報章撰文，對施政報告關注青年發展大表歡迎，又話政府致力優化條件、培育香港青年人成為世界公民嘅做法，同佢嘅個人目標係一致，推動有關工作係基於常識同務實態度，而唔係政治考量。
佢仲提到，早喺去年嘅施政報告，政府已經提出要成立創新及科技局，計劃一直得到學界廣泛支持，但就受到立法會泛民主派「拉布」阻礙，批評有關「為阻延而阻延」嘅做法會損害香港，希望今年施政報告中受支持嘅措施唔會再遇到呢種情況。不過，對於特首批評港大學生會刊物《學苑》，馬斐森就冇喺文章中回應喇。
