政壇：郭偉強立會廣派「炸彈」
年近歲晚，喜事連連，工聯會立法會議員郭偉強下月九日正式做老襯，同女友Myolie喺尖沙咀一間酒樓擺酒結婚，尋日立法會召開內務委員會，佢就趁機向建制派議員派「紅色炸彈」，派嘅、收嘅都笑到合不攏嘴，唔少議員仲讚佢終於「大個仔」喇、要成家立室。
郭偉強展示其請帖。
蔣麗芸（Ann）話，郭偉強結婚後，建制派就得番陳克勤同傍住郭偉強派帖嘅麥美娟係單身貴族，阿Ann話，自己識得唔少「筍盤」，可以介紹畀麥美娟喎，真唔真？係就要趁下月情人節嘅良機開行Turbo喇！
麥美娟話郭偉強婚宴嘅時候會代收賓客禮金，仲提醒佢過年記得派利是畀佢添。
