政壇：會計界Big 4鍊「車」行善
人力車係老香港嘅街頭一景，中環遮打道行人專用區聽日都有一場人力車大賽，由ACCA（特許公認會計師公會）香港分會舉辦嘅「ACCA公益關愛日」舉辦嘅賽事，要啲參加車拉住坐有乘客嘅人力車喺街頭賽跑，雖然好辛苦，但為咗慈善，業內人士真係一啲都唔腳軟。
「ACCA公益關愛日」今年已經去到第十八屆，一班來自Big 4（四大會計師事務所）嘅會計專才，以及來自跨國企業、商業機構、院校嘅參賽者，齊齊爭奪人力車大賽獎，今年同場仲安排咗魔術表演，令參加者、捧場者更加有睇頭噃！
人力車比賽夠地道
點解佢哋會揀人力車嚟比賽呢？主辦機構話，人力車曾經係香港盛行嘅代步工具，夠晒地道，可以宣揚本港文化特色之餘，同時鼓勵與眾同樂嘅精神。賽事當日，仲設有「最突出服飾獎」、「最佳啦啦隊獎」同「最高籌款隊伍獎」，提供足夠機會畀各位會員為呢項籌款盛事出一分力。至於今年籌得嘅善款，將會捐畀香港啟迪會、和諧之家，以及禧福協會三個機構。
