全民退保成共識 究竟還要拖幾耐

呢，最新一份施政報告用咗唔少篇幅討論扶貧安老助弱，仲話預留五百億元改善退休保障添。聽落好似幾有誠意，但睇真啲原來一味潑冷水。呢頭話學者提交嘅研究報告，認為「免審查、全民劃一金額」嘅退休保障係長者應有權利，嗰頭又話社會上好多人反對免審查方案，又強調全民退保有財務可持續性及「誰來付鈔」等問題，總之就係困難重重啦。

財政司司長曾俊華甚至出到「靠嚇」呢一招，指所有實行全民退保嘅地方，最終都係爆煲收場喎。嗱，退休保障公眾諮詢下半年至啟動，港府家陣就推三阻四，藉口多多，擺明想卸責喇，難怪連幫港府撰寫報告嘅港大學者周永新都批評當局變相落閘。咪畀人睇死吖，對於全民退保問題，港府一係拖到無影無蹤，一係引入資產審查機制。所以話啫，打工仔想退休後安枕無憂，旨意政府真係蚊都瞓蛇都死喇。

真係諗極都唔明，全民退保討論咗十幾年，社會上早有共識，依家仲喺度煲無米粥，簡直離晒大譜。話時話，講明係全民退保，如果引入審查機制，搞到好多人被拒之門外，同原意背道而馳，想唔引起爭議都幾難。正所謂，不患寡而患不均，家陣社會矛盾咁尖銳，民怨咁大，如果連退休保障都唔能夠雨露均霑，唔嘈到拆天至奇喇。

可能有人會話，好鋼用在刀刃上，公帑始終應該幫助最有需要嘅人。問題係，邊啲至係最有需要嘅人？審查門檻又應該點設定？正如學者話齋，部分長者即使有資產，甚至擁有五、六十萬元積蓄，都唔保證退休後可以安枕無憂。可以想像，除非當局效法其他地方引入排富條款，將最有錢嗰班排除在外，如果唔係，首當其衝嘅肯定又係中產嘅咋。

所以話，香港中產人士都幾悲哀o架，稅就有份納，福利就冇份享，有人將中產比喻為母牛，食嘅係草，擠出嘅係奶，真係一啲都冇講錯。你話嘞，如果連退休生活都得唔到保障，中產人士會點諗呢？又會有咩反應呢？

講到底，確保市民老有所養，係政府嘅基本責任，特別係港府坐擁金山銀山，更加冇理由推卸責任，如果一味諗縮數，盞添煩添亂嘅咋，叮！