城中鏡：雷軍推小米Note 單挑iPhone 6 Plus
小米上星期推完紅米2，市場滿心以為尋日舉行嘅北京新產品發布會係公布小米5，被外界稱為「雷布斯」嘅小米創辦人雷軍就畀個驚喜市場，新推出嘅旗艦機原來係小米Note，其中售價3,299元（人民幣‧下同）嘅頂配版，更為市場視為單挑蘋果公司（Apple Inc.）舊年九月推出嘅iPhone 6 Plus添！
雷軍
小米Note屬5.7吋嘅大屏幕智能手機（iPhone 6 Plus是5.5吋），但定價果如雷布斯早前透露，唔再係市場見慣嘅1,999元。小米Note最平售價係4G雙卡雙待嘅16G版本，售價2,299元，而64G嘅售價為2,799元，至於被視為單挑iPhone 6 Plus嘅64G小米Note頂配版，就屬雙卡雙待款式，支持最新4G網絡LTE-CAT 9，不過定價係3,299元，即折合逾4,100港元。
能抵墮地撞擊
雷布斯喺發布會上講解機身設計，仲話經過測試，能夠抵禦日常跌落地下嘅撞擊，聽落就覺得呢句說話，好似針對蘋果公司近年新款手機跌落地就爆玻璃嘅弱點。為咗令用家更得心應手，小米為呢款手機推出每年199元嘅意外保，無論係爆屏、前後玻璃損壞同埋入水都喺保養範圍（iPhone入水即無保養）。而且小米Note嘅鏡頭設計，據講技術更勝iPhone 6 Plus，就係後置鏡頭位做到內嵌式（iPhone 6 Plus是突出，較易弄花鏡頭），而小米Note前置鏡頭像素亦勝一籌，有400萬像素（iPhone 6 Plus得120萬像素）。
今次小米Note頂配版走高檔路線，定價逾4,000港元，比iPhone 6 Plus 64G賣7,188港元仍然便宜達3,000港元，不過內地網民就好似唔多受落，有網民話無指紋又無NFC，認為無賣點。
