政壇：搞搞政：五方會談辭職公投公文袋縮沙

因為會上大部分人，例如雙學同佔中三子，都唔支持白鴿黨喺表決後辭職，當中仲有人建議搞番五區變相公投，咁就唔怕畀白鴿黨搶盡政治光環。更有非政黨團體提議，要搞就搞到最激，整鋪二十七名泛民議員總辭啦，但呢個建議當然無人理佢，有人仲彈咗句「咪傻啦」作回應。據聞公文袋就第一個淆底，耍手擰頭，無議員肯辭職。

辯稱市民唔支持

聽聞會上其中一個大力反對辭職公投嘅係公文袋，佢哋不停強調收集過一輪地區意見後，發現市民對辭職公投反應麻麻，甚至係偏向負面。所以佢哋唔支持五區公投，更加唔支持乜嘢二十七名泛民議員總辭。市民唔支持其實只係擋箭牌，實情就係該黨唔想自己友辭職，尤其係九龍西毛孟靜同新界西郭家麒。

有白鴿黨人就好不滿，既然公文袋唔同意公投，就應該對外都係咁講，但公文袋對外扮無所謂，對內就鬧爆。該白鴿黨人透露，佢哋都有諗過五區公投，但當時佔領行動未結束，呢個方案就因為得唔到各黨派共識而擱置，講得白啲，即係有政黨縮沙唔敢辭職。講到底，泛民政黨都係各懷鬼胎，鬼打鬼互指不是，睇怕做乜都係注定失敗。