政壇：建制派北上探中央口風
喺佔領行動過後，泛民主派重新洗牌，到底北京部署同大方向有否改變，建制派都好想知道，所以近日建制派都從各自渠道北上收風，務求掌握第一手消息。好似新民黨主席葉劉淑儀，據聞佢飛去北京同港澳辦官員見面。
葉劉一連兩日缺席特首宣讀《施政報告》同答問大會，已令政界猜疑，我哋尋日終於打聽到，佢周一晚上飛咗去北京，一共留咗喺北京四日，尋晚先夜機返港。據聞佢今次北上，先後同港澳辦、發改委官員見面。我哋問過佢到底傾咗啲乜？係咪同港澳辦主任王光亞見面？佢就笑而不語，只係話同「老朋友」見面食飯，又話經過今次之行，有啲新諗法喎。
據聞今日下午，深圳紫荊山莊有場人大舉辦嘅專題講座，基本法委員會主任李飛將南下做主持，聽聞一批港區全國人大知道有京官南下，尋晚已經心急如焚趕上深圳，希望快人一步，收到北京對最新形勢嘅判斷。據悉，呢場專題講座唔係講政改，只係講內地經濟，但李飛會否中途「講話」，好快揭盅。
