政壇：大律師公會女主席揸莊
近來不時就政治議題發聲嘅大律師公會，尋日舉行周年大會兼換莊，毫無懸念由公會前副主席、現任執委Winnie譚允芝接替Paul石永泰自動當選主席，係公會十六年來再度出現女主席，副主席則由林定國同鄭華淵出任。新主席誕生於「亂世」，阿Paul臨別秋波對Winnie有乜寄語呢？
譚允芝（右）接替石永泰（左）出任大律師公會主席。
阿Paul笑言Winnie夠硬淨，對佢好有信心。Winnie亦都話二人喺公會合作共事多年，投契之餘，處事風格亦相似。唔通公會將會延續過去兩年出位作風，言論繼續惹火？今年適逢政改年，政治爭議肯定拗到火紅火綠，出爐主席Winnie強調公會唔係政治團體，但若社會有同法治相關嘅議題需要公會發聲，公會一定會責無旁貸，但始終新一屆內閣仍未正式埋班，要發聲似乎未係時候。
雖然Winnie同阿Paul處事風格相似，但阿Paul笑言二人唱歌風格就唔係好似喇！無他，Winnie係行內公認嘅女高音聲樂家，阿Paul過去則毫不隱瞞最愛尹光同夏金城，大纜都扯唔埋啦！
