政壇：田二少要攞青委會開刀

除咗批評成員嘅組成之外，田二少喺會上又話青年事務委員會應該係一個溝通嘅橋樑，但淨係搞舞會同大型活動呢啲門面嘅工夫，似乎冇用心去聽青年嘅意見。佢話青年問題可能係一個計時炸彈，仲問可唔可以改革委員會，例如將四分之一嘅成員，交由青年互選產生，咁仲有代表性喎。

青年忙工讀 難應付開會

對於田二少嘅批評，李宗德話擔任青年事務委員會嘅委員，除咗要有心，仲講求對呢方面嘅知識，擔心年輕人欠缺足夠培訓，未去到擔任委員嘅地步。佢又認為唔好太着重委員係咪富二代，佢哋身為大企業嘅代表，係有責任就青年事務畀意見，而且好多政策需要靠佢哋幫手執行。

至於好多委員都係「非青年阿叔」，佢就分享當年擔任主席時，同好多十幾二十歲嘅後生仔開會嘅經驗。佢話年紀大啲嘅委員，多數擔任高級職位，時間上有較大彈性，相反後生仔規限多，要兼顧讀書同工作，技術上未必能夠應付到定期開會，所以劃一規定委員歲數未必係好事。不過，佢都大讚年輕人喺回應政策方面表現唔錯。

陳振彬就回應話委員會內有青年團體、社工、青年服務者等，轄下亦有四個工作小組，覆蓋範圍廣泛。佢又話委員會三十名委員當中，約四成人都未夠三十五歲，而委員會亦設增選委員，約有二十至三十人，好多都係三十歲以下嘅後生仔。佢覺得即使年輕人佔大多數委員，都唔代表可以解決到時下嘅青年問題。講到底，佢希望田二少可以花啲時間了解下青年事務委員會嘅背景同運作。