創新科技得把口 一事無成何足奇

一如既往，「創新及科技」喺施政報告佔有一席之地，今年嘅亮點係當局為創新及科技基金注資五十億元。特首梁振英話喎，該基金已為超過四千二百個項目提供約八十九億元資助，去年仲擴大資助範圍，加強對下游研發及大學嘅支持添。今次注資之餘，仲會將投資研發現金回贈計劃納入基金，並正式設立企業支援計劃，加強資助私營機構研發項目咁話。

講就好聽嘞，問題係，科研係高成本玩意，話係燒銀紙都不為過，區區五十億元，又要資助下游研發，又要資助大學，仲要資助埋私營機構，你話點夠分配吖。其實，要發展創新科技，除咗提供資金，政策配合都好重要o架。睇吓新加坡吖，為咗吸引高科技企業進駐，不惜提供稅務及土地優惠，而且動員唔同部門全力配合，經過多年努力，先至搞得有聲有色，創新科技喺亞洲名列前茅。人哋做得到，港府又做唔做得到呢？

唔係長他人志氣，滅自己威風，港府經常吹噓嘅科學園，話就話有數百企業進駐，原來只係表面風光咋。科技園行政總裁馬錦星早前先至大吐苦水，話園內有超過四百個職位空缺。點解有工冇人做？之唔係本港大學生覺得創新科技業冇前景，唔願意入行，而外資公司又因為香港冇人才，影響進駐意欲囉。

其實，香港唔係冇人才，淨係睇吓年年都有唔少學生取得國際殊榮就知喇，當局冇為人才提供發展機會至係問題所在。正如前港大校長徐立之話齋，全港所有大學獲得嘅科研資助，夾埋都唔及內地一間普通大學。港府孤寒成性，人才點會留港發展吖。所以話，港府成日話要發展創新科技，根本係葉公好龍。

冇計喇，港府一味口號治港，從「乜港物港」到「優勢產業」再到「做多做闊」，全部得個講字。施政報告重提成立創新及科技局，但家陣咁嘅政治環境，都幾難過到立法會。最好笑嘅係，當局仲話要覓地興建戲院，推動創意產業喎。話時話，與其覓地建戲院，不如覓地起樓好過喇，叮！