城中鏡：梁青華夥友賀登「陸」
話說香港鐘表業總會前主席「華哥」梁青華早前喺喜運佳鐘錶榮休，近期正密鑼緊鼓自立門戶開新錶行。早幾日佢廣邀城中老友出席其「退伍登陸之夜」，唔講仲以為佢打算進軍大陸市場，實情係慶祝佢六十歲生日。一眾鐘錶界猛人包括總會永遠榮譽會長孫秉樞、前主席區宇凡同黃業光等人齊去歡聚，氣氛好熱鬧。
孫秉樞（右二）、區宇凡（左一）同黃業光（右一）舉杯祝賀梁青華（左二）「退伍登陸」。
洪為民送贈嘅得意軍裝公仔。
寶齊萊香港行政總裁曾國雄（左）同香港珠寶玉石廠商會會長冼雅恩都去沾喜氣。
黃海燕（後左起）、吳嘉瑩、姚新景、關照洋同梁青華太太（前）一家親。
晚宴再收契仔契女
香港菁英會前主席Witman洪為民都有到場，仲夾份送咗好得意嘅軍裝公仔做賀禮。原來佢同華哥相識十幾年，現時Witman係交通安全會主席，華哥係副主席。講起交通安全，Witman話香港宣傳道路安全五十年，依家無論司機或行人過馬路都唔會亂嚟，近年內地官員都來港取經添！
同場仲有著名粵劇同武術演員關德興嘅孫仔關照洋，佢係華哥嘅契仔，啱啱由夏威夷返港探親兼度假。講番晚宴另一高潮，就係華哥又收多一名契仔同契女，其中契仔係博愛醫院副主席吳錦青嘅女婿James姚新景，James太太Alyssa吳嘉瑩同外母黃海燕都去見證開心時刻。
黃海燕笑笑口話，佢一家人同華哥係舊相識，三年前James結婚後先識華哥，估唔到兩人好投契，無所不談，James同自己爸爸都冇咁多嘢講喎。
