高官喺立法會瞓覺，最經典一定係教育局前局長「孫公」孫明揚，估唔到孫公退休後終於後繼有人。現任教育局局長「吳得掂」吳克儉尋日喺《施政報告》宣讀期間，都不敵睡魔來襲，但佢死撐唔係瞓，只係閉目養神。政務司司長林鄭月娥同幾名局長都不時低頭又托腮盡顯疲態，似乎真係好眼瞓，唔通佢哋呢排成日通頂所以體力透支？

吳克儉

眾多官員之中，吳得掂瞓得最犀利，佢為免被人影到自己低頭，諗住用手撐住下巴，但可能有嘢承托瞓得仲舒服，除咗中場休息嗰幾分鐘外，好少見佢對眼係張開。事後學民思潮召集人黃之鋒就批評吳得掂瞓覺，仲反問如果有學生上堂瞓覺，係咪會獲得批准喎。咁樣被年輕人寸法，認真羞家。

不過，講番句公道說話，芸芸官員之中，唔止吳得掂係咁，連林鄭都係疑似搵周公，財經事務及庫務局局長陳家強亦扮「沉思像」，經常用右手托腮、低頭閉目，反而保安局局長黎棟國就龍精虎猛。睇嚟下次中場休息要延長多幾分鐘，等班官員飲杯咖啡醒醒神至得喇！

第一手消息請下載on.cc東網iPhone/iPad/Android/Windows Phone Apps