特首尋日喺立法會宣讀《施政報告》期間，好多議員唔夠半個鐘就去搵周公，反而全場最老嘅議員劉皇發無瞓覺，但佢就唔小心戴咗條鮮黃色嘅呔，唔通佢撐佔領行動？不過，好彩佢好快醒覺，一見特首入場即閃電式除呔，扮晒無事發生咁，真係薑愈老愈辣。

劉皇發（前右）戴咗條鮮黃色呔出席會議，一見特首進場即急急除下。

張宇人小睡片刻後即拿起手機睇小朋友相片。

五名議員同玩手機，場面有趣。

張宇人瞓醒玩手機

話說飲食界張宇人同工聯會KK黃國健頻頻搵周公，KK仲要黨友鄧家彪拍醒。至於張宇人瞓一陣就醒咗，仲好精神咁玩手機，但佢唔係睇新聞亦唔係睇股票，而係睇緊啲小朋友相，唔通係佢啲乖孫？其實主席曾鈺成都好體諒班議員，首次喺中途特設五分鐘小休，點知五分鐘過去，好幾位議員如好眼瞓嘅KK、鍾樹根、石禮謙同易志明消失咗十幾分鐘至歸位。

咁多位建制派議員中，只得新民黨主席葉劉淑儀缺席，據聞佢前日突然有要事飛去北京，施政報告宣讀前突然去北京，實在令人有好多聯想，莫非要同重要人物密會？

第一手消息請下載on.cc東網iPhone/iPad/Android/Windows Phone Apps