城中鏡：葉家寶「濕平」唔睇價錢
亞視陷入財困，十一月份糧終於出到畀員工，但隨即又要拖欠十二月份糧。身為亞視「N朝元老」嘅執行董事葉家寶，近期忙於應付傳媒，又要催促股東「泵水」出糧。不過，面對種種負面因素，都破壞唔到佢購物心情。我哋上周末就喺尖沙咀一間年輕人時裝店撞到西裝骨骨嘅葉家寶，發現佢心情勁靚，短短十幾分鐘已經掃咗三大袋戰利品，唔通佢一出糧就去買衫？
葉家寶（左）買嘢唔睇價錢，財力分分鐘好過亞視。
葉家寶購物策略係速戰速決，仲唔多覺佢有睇價錢牌，十分鐘左右就行去櫃位付款，睇嚟亞視無糧出，都影響唔到佢購物意欲喎。佢付款時被客人認出，仲上前同佢握手又叫佢加油，葉家寶即刻打蛇隨棍上，交換電話後就叫嗰位客人有興趣可以上亞視節目做嘉賓，仲話會叫監製打畀佢喎，葉家寶呢位亞視元老都算唔話得。如果呢位客人真係去做嘉賓，唔知仲有冇車馬費收呢？
