城中鏡：方文雄籲年輕人買樓等時機
依家青年人話樓價貴難買樓，從事地產及收租嘅老手又點睇呢？協成行集團董事總經理David方文雄日前出席聯合國兒童基金活動時話，現時買唔到樓嘅年輕人唔使心急，呢段時間應該先儲定錢，唔好因為樓價高不可攀就將啲錢亂咁使，否則一到有機會嘅時候就只得個睇字。言下之意，即係人要等機會，但機會絕對唔會等人。
方文雄寄語年輕人儲定錢，等待時機買樓。
孔美琪（左）同黃紹基（右）一早到場睇小朋友繪畫。
陳晴話抄經可以令心境平靜。
陳晴迷上抄經放鬆
聯合國兒童基金香港委員會日前舉行第八屆「小畫家大夢想繪畫比賽」，近二千名十二歲以下兒童齊集維園中央草坪，籌款資助貧困地區孕婦到醫院進行產前產後檢查及住院分娩。委員會主席Judy陳晴同籌委會委員David等一早就去到現場觀賞。David經過「紅封包義賣籌款」攤位時，仲自掏腰包買咗十包利是封，身體力行支持活動。
見David好認真睇小朋友繪畫，原來佢話不時會去大會堂或上環荷李活道畫廊睇畫，事關佢覺得香港人生活節奏同步伐好急促，如果有一幅畫作可以在鬧市中吸引人停下來駐足觀賞的話，咁就肯定係一幅唔錯嘅作品喎。
至於Judy同副主席Maggie孔美琪就笑言繪畫唔算叻，Judy形容小時候其實根本就唔識分自己有乜嘢興趣或喜好，全靠屋企人逼佢去學習，而佢現時就鍾意抄經，可以令心境平靜放鬆。Maggie就透露，小學五年級時，老師已經同佢講「點解你揀繪畫班唔揀唱歌呀？」暗示佢強項唔係繪畫方面。
同場仲有支持活動嘅周大福珠寶集團董事總經理黃紹基，佢話以前未普及用電腦繪圖時，佢不時會用人手畫圖畀客睇，就係因為咁先加入咗珠寶行業。
