古人智慧有時真係唔到你唔服。好似個「家」字咁吖，「宀」指屋頂，「豕」係豬嘅象形，「宀」下有「豕」借代古人喺屋企下層養豬，有屋住又有肉食，先至係家。查實「家」字唔單止形象化，仲好貼近香港現實添。唔係咩，家陣好多市民無立錐之地，即使有瓦遮頭，唔係下層養豬，蝸居都係同豬欄差唔多嘅咋！

呢，港府後日發表最新施政報告，唔少團體呢幾日把握最後機會，踩上政府總部請願，其中最多人講嘅就係居住問題嘞。有人促請港府增建公屋，有人建議放寬未補地價居屋同公屋出售比例，有人要求政府盡快重置舊型屋邨，總之五花八門，不一而足。

講真，只要睇吓家陣基層市民嘅生活環境有幾悽慘，就知點解佢哋咁勞氣。好似深水埗區咁吖，劏房林立，唔少更加係甩皮甩骨，外牆鋼筋外露、石屎剝落等問題非常普遍。正如有人話齋︰幸福嘅家庭都係相似嘅，不幸嘅家庭就各有各嘅不幸，劏房戶嘅悲慘故事真係多到天光都數唔完o架，有一家三口住喺不足一百呎嘅劏房，搞到要用木板同鐵枝劏多個閣樓；有劏房住客懷疑鄰居偷電而大打出手，鬧上差館……總之就貧賤家庭百事哀，講起一殼眼淚喇。

咪以為淨係低下階層受房事問題困擾，中產年輕人一樣咁閉翳嘅咋。港府最近推出二千幾個新居屋單位，結果申請者爭崩頭，上樓仲難過中六合彩。而喺芸芸碰運氣嘅人當中，就有一位廿九歲、月入五萬元嘅測量師，佢為咗符合入息上限，竟然主動要求老闆減薪，你話係咪令人悲哀吖。

話時話，今年施政報告主打年輕人向上流動問題，出發點無疑係好嘅，之但係咁喎，今時今日樓價高處未算高，年輕人就算升職加薪再快都追唔上樓價升幅，冇父母幫手嘅，想上樓仲難過登天，即使上到位又有咩意思吖。

真係諗極唔明，香港唔係冇錢，亦唔係冇地，點解房屋問題搞到積重難返o架？你睇人哋新加坡吖，同樣地少人多，但人哋不僅有樓住，而且面積大過香港多多聲。咁即係點？即係港府無能咯。

講開古人智慧，不妨贈多港府兩句，「有恒產者有恒心，無恒產者無恒心」。家陣民生問題叢生，社會動盪不安，青年怨氣沖天，歸根究柢都係住屋問題未解決，姑且睇吓施政報告有咩好橋。叮！

第一手消息請下載on.cc東網iPhone/iPad/Android/Windows Phone Apps