熱衷投資股票地產嘅富豪曾文豪嫁女，其女兒曾昭怡同新婚丈夫郭俊賢前日已註冊，昨晚舉行婚宴，筵開四十席宴請親友，出席嘅名流紳士全部一雙一對，包括早前公開發聲明撐女友楊愛瑾非第三者嘅永安太子爺郭永淳，同女友翹到實拍拖去飲，並大方企定定任影晒恩愛；但相對另一對賭王女兒何超瓊與同性密友俞琤卻甚為避忌，超瓊先行到場，俞琤相隔十分鐘才到達，俞琤步伐甚大，似趕入會場見超瓊；而數最矚目的，要算是舊年四月在法國完婚嘅何柱國兒子何正德同太太林恬兒，現場所見林恬兒穿上貼身低胸晚裝，腹部隆起，似懷孕五個月，上圍亦豐滿不少。而其他嘉賓還包括鄧愛嘉與丈夫、玩具大王蔡志明夫婦、大家樂太子女陳浩寧同老公趙益坤等，場面衣香鬢影。

曾昭怡（左）與丈夫郭俊賢擺婚宴，吳雨霏（右）做姊妹。

何正德拖住疑似懷孕嘅太太林恬兒到賀。

郭永淳同女友楊愛瑾翹到實拍拖去飲。

何超瓊同俞琤（圖）前後腳到場。

何超瓊

尋日新娘子出現時，令人眼前一亮，原本身形圓潤嘅佢，為婚禮而積極減肥，清減不少嘅佢下巴尖尖，顯得明艷照人，而姊妹團亦個個靚女，包括幼稚園同學歌手Kary吳雨霏同張天愛女兒邢嘉倩等。一對新人喺晚上六時半出來受訪，兩人即場連咀兩次。新娘子手戴約五卡巨鑽婚戒，佢話：「依家開始另一個階段，心情唔係太緊張，可能因為太開心。等咗咁多年，終於開花結果。老公尋日講咗愛的宣言，我都有感動到喊，之前以為自己好硬淨唔會喊。」新郎就話好開心能娶到好老婆，又指婚後會努力造人。問到新娘子可會催促好友Kary結婚，佢話緣分唔能夠逼，亦唔會刻意將花球拋給Kary，有緣就會接到。

第一手消息請下載on.cc東網iPhone/iPad/Android/Windows Phone Apps