城中鏡：李文斌勤練跑 備戰馬拉松
呢排天氣凍，得閒飲杯熱飲或食嘢暖吓肚真係幾舒服，但唔經唔覺就會食多咗，為保持完美體態，好多名人都會定時定候做運動，當興趣之餘又對身體好。早前喺馬場同啲名人傾開，發現好多人都有做運動習慣，好似理文造紙執行董事Edmond李文斌同太太Amanda何芷韻，平日都勤力做跑步機健身，雖然Amanda身形明顯fit咗，但佢就話跑得唔夠老公快，仲要再努力啲喎。
李文斌同太太何芷韻定時做跑步機健身。
林凱章讀書時係游泳校隊成員，熱愛游水健身。
史佩加鍾情有速度感嘅運動，右為其兄史昊洺。
至於已經跑過四、五次馬拉松嘅Edmond就話，今年都報咗名參加馬拉松，但佢透露，感覺到自己體重增加咗少少，驚跑唔番往年成績，為咗達到過往喺六十分鐘內完成十公里項目嘅水準，可能就要食少啲，加緊練習至得喇！
林凱章聽歌游水
菁英會副主席林凱章亦有做運動嘅習慣，原來佢喺外國讀書時係游泳校隊成員，參加過唔少比賽並取得勝利。佢熱愛游水嘅程度去到不分春夏秋冬，冬天游水都唔怕喎。講起好多室內泳池都有暖水時，佢就話所謂暖水可能都係十幾度，唔好話跳落水，冬天除件衫都覺得凍啦，但落水一陣就會適應。佢仲話近年市面唔少防水mp3可以用嚟邊聽歌邊游水，游兩、三個鐘都唔會悶，但去沙灘就唔好用喇，費事鯊魚游埋嚟都唔知。
仁愛堂副主席史顏景蓮女兒兼馬主Kathleen史佩加就獨愛有速度感嘅運動，滑雪就啱晒佢。不過，滑雪受季節同地理條件限制，唔係隨時可以滑，佢對上一次滑雪已經係舊年三月，而聖誕假期滑雪勝地一定人多擠迫，所以會等假期完咗先計劃再出發。
