政壇：搞搞政：投票意向飄忽業界(目及)實怪醫
二○一七年特首普選方案通過與否，關鍵在於立法會有無三分之二，即至少四十七名議員投票支持，其中外號「怪醫」嘅立法會醫學界議員梁家騮向來投票意向飄忽不定，令到業界金睛火眼(目及)實佢嘅投票意向。
設計圖片及對白
被寸「不羈放縱愛自由」
怪醫尋日聯同業界舉辦政改論壇，醫學會會長史泰祖、前會長蔡堅等人都係論壇嘉賓。怪醫表明會向一萬四千多名業界選民派發問卷收集意見，仲首先闡述個人政改立場，話如果政府遲啲提出嘅政改方案比之前嘅有少少進步，佢覺得市民都應該要接受新方案「袋住先」。至於點樣先至叫係「進步」，怪醫聲稱「進步」與否好難定義，但認為「全票制」肯定唔係一個進步嘅方案，表明如果當局最終真係拋呢個方案出嚟，佢一定會毫無疑問否決佢喎。
面對怪醫過去投票意向飄忽不定嘅前科，台下業界代表不斷質疑怪醫係咪想唔理業界訴求，叫佢直接答會定唔會跟民調結果投票。怪醫唔單止畀業界逼埋牆角，連論壇主持人都寸爆佢「不羈放縱愛自由」，話雖然明白怪醫一向嚮往自由，但業界擔心佢過分自由會亂投票，叫佢唔好再帶啲選民遊花園。
業界中人步步進逼，似乎佢哋嘅潛台詞係想用民調結果綑住怪醫呢隻無腳嘅雀仔，但係怪醫疑似喺現階段唔想畀任何承諾，惟有爆出一句「可唔可以畀少少空間我」，又揚言喺政府方案出台後會做多次民調，之但係如果民調回覆比率太低，或者正反意見比例相近，佢會再考慮其他因素先再決定投票意向，總之就死都唔肯講最後到底會點投。
