政壇：內地智庫邀港猛人論政
究竟香港喺「後佔領時期」何去何從？呢個議題備受關注，據聞最近有名為「天大研究院」嘅內地智庫，近期開始邀約不分建制、泛民嘅政界中人出席圓桌會議，討論香港將來管治等議題，各方都畀面出席，據知有一次仲齊集特區政府同西環代表出席，認真耐人尋味。
消息指「天大研究院」最近一次圓桌會議喺舊年十二月中舉行，出席者有十多人，建制方面有基本法委員會委員陳弘毅、港區全國人大代表張明敏等人，泛民方面則有港大社會工作及社會行政學系副教授羅致光，據聞中央政策組顧問王卓祺、中聯辦研究部部長曹二寶都係座上客。陳弘毅、羅致光等接受查詢時，都認係首次出席有關會議，強調唔多知研究院嘅背景。
翻查資料顯示，研究院由香港商人方文權喺○五年創立，主力研究內地發展，亦有提及中美關係等項目，據知最近曾為國家領導人出書，不過後佔領時期各方都絞盡腦汁為香港把脈，呢個內地智庫究竟有幾大影響力，要視乎未來有乜新搞作，到時或有端倪。
