唔少在職婦女都希望政府增加課餘託管服務，令佢哋可以更安心工作。勞工及福利局局長張建宗尋日就話，社會福利署上月已喺全港推出「加強課餘託管服務」，為六至十二歲兒童喺平日晚上、周末同學校假期，提供延長時間的託管服務，畀喺課餘時間未獲父母照顧嘅兒童，得到適切嘅照顧。

已撥千七萬增服務

張建宗尋日喺網誌撰文，話為咗進一步支援有兒童照顧需要嘅家庭，政府喺本年度《財政預算案》中宣布每年增撥一千七百萬元，資助全港多間課餘託管中心，增加約三百個全費減免的「加強課餘託管服務」名額。有關服務一般嘅開放時間為周一至周五，由下午四時至晚上九時；周六、周日同學校假期則提供全日十小時嘅服務，實際開放時間按個別服務單位而定。

佢又話新營辦課餘託管服務的機構可按實際需要將一個豁免全費嘅名額分拆為兩個豁免半費嘅名額使用，令更多兒童受惠，期望有關服務可釋放婦女勞動力同減輕佢哋嘅經濟壓力喎。

第一手消息請下載on.cc東網iPhone/iPad/Android/Windows Phone Apps