政壇：田二少廣西會「紅娘」
新民黨副主席「田二少」田北辰日前同一班黨員去廣西考察，佢尋日喺社交網站上載一張同三位靚女嘅合照，仲大讚三位係來自「廣西的紅姑娘」。佢話由於三位女士着住一身紅色衫，令佢諗起喺香港已經進身矜貴海鮮一族嘅紅衫魚。
田北辰巧遇三位身穿佢旗下時裝品牌嘅廣西「紅姑娘」。（互聯網圖片）
講起紅衫魚，田二少又話當地人會將經鹽醃一夜嘅紅衫魚戲稱為「一夜情」。除咗紅衫魚外，廣西仲有另一紅色著名農產品，就係有「紅姑娘」之稱嘅番薯。
田二少笑話，當時佢都以為「紅姑娘」淨係指番薯，但當佢參觀廣西規劃館後，館長突然叫幾位着紅衫嘅「紅姑娘」過來打招呼，又話原來幾位規劃館職員身上着住嘅紅衫係田二少旗下時裝品牌嘅出品之一，令佢感到喜出望外。
