政府未公布二○一七年特首普選終極方案,泛民主派事先張揚一定會否決,政改似乎「凍過水」,不過有人仲未絕望,講緊嘅係六十年代喺美國讀番書嘅財爺鬍鬚曾,佢喺最新網誌暗喻政改,話世事無絕對,有啲說話都係唔好「講得咁死」。點解鬍鬚曾咁講?佢就引用當年古巴導彈危機,話全靠美蘇進行秘密談判同有船長顧全大局,最終先唔使爆發世界核戰。照佢咁講,唔通佢知道有人就政改秘密談判緊?

設計圖片及對白

鬍鬚曾尋日喺網誌話,自己當年喺美國讀書,啱啱係古巴導彈危機結束,所以對呢件事一直感受好深。佢話當年除咗靠時任美國總統甘迺迪同時任蘇聯總統赫魯曉夫進行秘密談判外,其實正正有人「放下面子,頂住壓力」化解危機,例如一艘喺古巴海岸戒備嘅蘇聯核潛艇,竟然誤測到美國發射導彈,當時蘇軍正受美軍深水炸彈夾擊,蘇聯潛艇又同莫斯科總部失去聯繫,艦長以為已爆發戰爭,諗住發射核彈還擊,幸好潛艇第二副手不同意,寧願冒死都要潛艇浮上水,獲總部確認先發射核彈。最終潛艇上晒水,當然知道係一場誤會啦!

誰是潛艇二副惹遐想

借用呢個故事作比喻政改,唔知道鬍鬚曾覺得泛民邊位仁兄,做緊潛艇第二副手角色,幫手防止大戰一觸即發呢?鬍鬚曾最後仲話,世事往往係峰迴路轉,柳暗花明又一村,導彈危機後美國想制裁古巴,但點知五十年過去,不但制裁唔到,仲畀古巴發展出一套自給自足嘅低碳經濟模式,令世界稱讚,所以佢先話咪將說話講到咁死。

鬍鬚曾咁講,隨即令人有好多聯想,到底佢係想話泛民唔好將說法講死,等自己難以轉身,定係暗示中央唔好逼得泛民太緊,以免泛民嚟個大反擊?

第一手消息請下載on.cc東網iPhone/iPad/Android/Windows Phone Apps