中環蘭桂坊本來係旅客必到之處,可惜近年藏污納垢,烏煙瘴氣,尤其係一班假難民胡作非為,更加搞到七國咁亂,用「人間妖域」嚟形容,一啲都冇誇張o架。

呢,話口未完又嚟喇。警方前晚喺老蘭掃毒,先後拘捕五個身上藏有毒品嘅非洲籍男子,全部係利用「酷刑聲請」攞行街紙嘅岡比亞人。原來,近排有販毒集團睇中呢班非洲人英語流利,安排佢哋兜搭客人,販賣毒品。就上個禮拜啫嘛,警方亦拉咗一名持行街紙嘅非洲裔男子,喺佢身上搜出市值超過二千元嘅懷疑可卡因。呢類罪案接二連三,唔怪得老蘭被稱為人間妖域喇。

話時話,近年愈來愈多來自非洲、南亞等地嘅假難民,佢哋以所謂酷刑聲請滯留香港,衍生唔少社會及治安問題,部分甚至被黑幫招攬參與毆鬥、販毒等。數據顯示,涉及酷刑聲請者嘅刑事案不斷上升,前年六月本港一個月內發生兩宗轟動社會嘅嚴重罪案,包括有位富商兒子當街遇襲受傷,一名內地女大學生喺重慶大廈遭強姦,涉案嘅都係酷刑聲請者,問你怕未。

咁都未算吖,呢班假難民除咗帶嚟各種社會及治安問題,仲增加咗香港嘅經濟負擔添。過去三年,港府已花費近十二億元公帑處理酷刑聲請申請及提供人道援助,預料最近呢個財政年度,開支仲會增加至十七億元新高,你話納稅人係咪冤枉吖。

係人都知,絕大多數偷渡客唔係政治難民,而係經濟難民,港府假仁假義,中門大開,來者不拒,簡直累人累物。

事實證明,本港難民政策根本不知所謂。當年司法機構裁定廿幾名持「行街紙」嘅南亞裔人士可以合法打工,自此之後香港就變咗無掩雞籠,各地難民源源不絕湧入,欲罷不能。入境處接獲嘅酷刑聲請個案累積超過一萬二千幾宗,滯留香港嘅多達六千幾人,佢哋喺蘭桂坊、尖沙咀一帶搵食,黃賭毒黑乜都做齊,你話嘞,香港有乜辦法唔七國咁亂吖。

所以話,港產官僚永遠冇好帶挈,佢哋請客,納稅人埋單,簡直豈有此理。

講到尾,假難民問題嘅癥結係港府婦人之仁,難民政策不合時宜。就算庫房水浸,都冇理由咁樣浪費o架,何況香港民生問題一大堆,房屋、安老、醫療、教育等在在需財,港府對假難民仁慈,根本就係慷納稅人之慨,叮!

第一手消息請下載on.cc東網iPhone/iPad/Android/Windows Phone Apps