燈光之下，拳來腳往，左一記上勾拳，右一下穿心腿，拳風呼嘯，血花四濺，惟聽不到台上哀號，亦未聞台下吶喊，只有……「各位『老友記』，睇完覺得點呢？我哋院舍以運動聞名，拳拳到肉，童叟無欺，入嚟住包你哋健健康康！」院長自負道。

「但係得職員出拳，院友似沙包多啲……」場面觸目驚心，參觀老翁不禁哆嗦。院長拍拍老翁肩膊，「你有無常識o架？電影《功夫》入面，周星馳被火雲邪神暴打，即時脫胎換骨，仲識得用如來神掌添！」

「我成身老骨頭仲要換，何況我唔係骨格精奇，點捱得住？我睇未脫胎就先投胎……」老翁一臉猜疑。院長一聽，毫無怒意，笑容依舊，「嚟得我哋度住，都係講個信字，要交個心出嚟！」交心之詞，何其動人，老翁軟下心腸，「好啦！我住喇！不過我得幾千蚊喺身。」

院長笑容盡散，面色一沉，「好，你咁有『誠意』，入到嚟實好好『招呼』你！」

第一手消息請下載on.cc東網iPhone/iPad/Android/Windows Phone Apps