健康快車香港基金早前搶閘喺元旦舉行新一屆理事會就職典禮暨富貴吉祥紅盤宴，數百名政商名人聚首一堂，新年快樂及恭喜聲不斷，更添喜慶氣氛。基金創立十八年，受助人超過十五萬人，令大家更為振奮。工藝精湛嘅陀飛輪陽剛氣濃，但只要有創意搭夠，又點止男士鍾意？早前港產陀飛輪品牌邀請前港姐李嘉欣親自操刀設計以可愛熊貓為主角嘅新款腕錶，部分銷售收益將捐贈慈善機構。美人加靚錶，連女士都趨之若鶩。

就職典禮
功臣
前高官李麗娟（右）當年有份促成健康快車香港基金成立，同創會主席方黃吉雯（右二）拍住做善事，太子珠寶鐘錶執行董事鄧宣宏雁（左）及婦科名醫江孟儀（左二）齊現身支持。

支持
縱橫遊執行董事袁振寧（右）帶埋一對寶貝兒子現身，為太太林藹欣（右二）及外父林賢奇（左）分別就任健康快車總理及副主席打氣，左二為林賢奇太太。

慷慨
健康快車名譽主席陳振彬（左）及副主席鄧鉅明齊齊出錢出力，幫內地貧困白內障患者重拾健康。

老友
「耳機大王」中華廠商聯合會副會長楊志雄（左）同健康快車副主席陳明耀老友鬼鬼，笑稱見對方多過見自己太太喎！

歡聚
前高官馬時亨及太太王培琪（左及中）與港大醫學院院長梁卓偉（右）元旦喜相逢，加倍開心。

新錶發布會
麗人
元旦起接任金紫荊女企業家協會主席嘅香港青聯副主席彭芷君（中），同靚女朋友許詠瑜（右）及容倩頎（左）齊去見識陀飛輪錶之創意款式。

效應
港產陀飛輪錶品牌創辦人沈慧林（左二）接連推出具明星效應嘅時款錶，令首間專門店主席李文偉夫婦（右二及一）及副主席張霈霖（左）愈忙愈開心。

興隆
「玩具大王」蔡志明兒子蔡加讚話，佔領行動結束後，旗下鐘錶及汽車生意都算唔錯。左為香港鐘表業總會永遠榮譽會長孫秉樞。

第一手消息請下載on.cc東網iPhone/iPad/Android/Windows Phone Apps