政壇：搞搞政：謝偉俊搞智庫頭炮轟貪曾
被指與西環關係良好嘅立法會議員謝偉俊（Paul）傳咗好耐要搞一個智庫，當時有傳佢曾經接觸過革新會成員黃博度。尋日阿Paul終於正式宣布另起爐灶，成立智庫「革新社」，但否認組黨，只係搵志同道合嘅朋友一齊論政，首先會聚焦官商勾結同樓價高企問題。
設計圖片
列6項深層次矛盾
講起兩大「病症」，阿Paul忍唔住點名批評「貪曾」前特首曾蔭權爵士貪污，以及在任時期放任樓價飛漲，搞到佛都有火。
阿Paul話，香港回歸十七年，無論政制、經濟、民生等各方面，都面臨緊嚴峻考驗，所以佢將會先聚焦引致民怨沸騰嘅深層次矛盾，佢列舉六項社會深層次矛盾，首當其衝係「官商勾結，世界第一」，仲點名批評曾蔭權、前政務司司長許仕仁及「貪湯」前廉政專員湯顯明，稱佢哋都被指收受利益，涉助商界牟利。其次係樓價居高不下，曾蔭權在位時，嚴重控制土地供應，導致樓價大幅飆升。當時市民對政府最直接嘅印象就係官商勾結、地產霸權，埋下市民對政府不滿嘅禍根。其他問題就包括青年難於向上流、貧富懸殊、中港矛盾等。
