法國巴黎接連發生恐怖襲擊同挾持人質事件,恐慌情緒極具感染力。尋日沙田馬場有賽事,唔少名人講起件事都各有感慨,四年前曾親歷日本世紀大地震嘅馬會大董葉澍堃(Stephen)就話,相信恐襲嘅目標唔係中國人,唔需要太擔心。至於利子厚就話,由於工作關係,佢經常要飛赴歐洲,巴黎一直畀人感覺係藝術之都,相當有文化同埋和平,所以佢對當地發生恐襲感覺好愕然,好彩近年佢多咗來往東南亞國家,所以冇咁驚。

劉業強直指多國機場保安鬆懈,擔心恐襲由此而起。

新界鄉議局主席劉皇發兒子劉業強(Kenneth)每年都會歐遊公幹三、四次,順道探望喺歐洲留學嘅兒子。Kenneth話,近年發現多國機場嘅保安鬆懈得多,唔少航空公司只係檢查旅客登記證就可以上機,連護照都冇望吓,擔心恐襲由此而起。

中文大學校長沈祖堯都有入場,講起早前有傳學聯、學民計劃參選區議會或立法會,沈祖堯話早有聽聞,仲同個別學生傾過偈添。咁佢會唔會支持有潛質嘅學生參選?沈祖堯話,學生咁大個仔,自己決定啦!但以佢所知,暫未有人計劃參選。

第一手消息請下載on.cc東網iPhone/iPad/Android/Windows Phone Apps