近日社會討論離唔開青年問題，商務及經濟發展局前局長馬時亨（肥亨）尋日出席青年論壇時，分享年輕時嘅經歷。肥亨話，當年大學畢業出嚟搵工做，莫講話冇手提電話，淨係打長途電話已經唔簡單。首先要親身去大東電報局等電話，每次通話以三分鐘計，兩分四十五秒時，接線生會問你補唔補錢，唔補就要斷線，好搞笑。

肥亨話，明白現今年輕一代較難向上流，單係講人工已經追唔上通脹。佢當年月薪一千六百元，已經可以買八呎樓，就算畀一半人工阿媽做家用，仲夠錢食飯、搭車同追女仔。佢又話，當年喺中環食一餐飯只需五蚊，但依家中環普普通通食餐飯講緊二百幾蚊，升幅成五十倍。

如果畀肥亨再揀多次，佢會選擇打工，抑或創業？肥亨就話，當年佢有成頭家要養，唔可以冒險，亦拎唔出所需資金，所以根本冇諗過創業。佢見工時仲希望老闆快啲請佢，因為好等錢用喎！

第一手消息請下載on.cc東網iPhone/iPad/Android/Windows Phone Apps