政壇：AV仁辭職由肥佬黎扯線？
民主黨（白鴿黨）立法會議員何俊仁（AV仁）突然提出要喺政府政改方案表決之後辭職，變相發動公投，結果梗係畀外界鬧爆。查實白鴿黨內好多人都對AV仁嘅大計有保留，而該黨中委會亦未及討論，明顯呢個決定唔係該黨嘅集體決定。莫非今次又係被踢爆多次捐款畀白鴿黨嘅壹傳媒集團前主席黎智英（肥佬黎）喺AV仁背後發功？AV仁前日就未有斷然否認。肥佬黎周身屎都仲喺度搞搞震、大玩扯線公仔，真係唯恐天下不亂。
設計圖片及對白
AV仁前日突然宣布會喺否決政府政改方案後辭職，變相發動公投，結果唔止畀建制派炮轟佢浪費公帑，就連泛民自己友都怒插，有人更質疑，AV仁係想藉公投，為白鴿黨喺今明兩年嘅區議會選舉同立法會選舉造勢。白鴿黨主席劉慧卿尋日都話，公投最大威力係喺投票前可唔可以帶嚟轉機，令社會出現一個有立法會多人支持嘅方案，對於AV仁投票後辭職發動公投，中委會都未討論過。好明顯，呢個決定只係AV仁個人意願。
疑赴台偷師再下命令
咁究竟AV仁點解有呢個決定？係咪肥佬黎背後發功？AV仁前日就冇否認，仲話︰「同民主黨內外一路有關心我哋行動嘅人都有傾過。」回顧過去一段時間，肥佬黎早前見完佔中三搞手後，就去咗台灣，返港後又密會有「李漢奸」之稱嘅白鴿黨前黨主席李柱銘等白鴿黨中人。台灣有多次藉唔同議題發動公投嘅經驗，實際上就係政黨為選舉造勢。肥佬黎同白鴿黨關係千絲萬縷，本港兩場選舉舉行在即，所謂肥水不流別人田，分分鐘係肥佬黎去台灣偷師之後再落柯打。
話時話，肥佬黎被指係佔領行動幕後黑手，警方已經預約咗佢助查，可謂周身屎嘅喇，依家仲喺度搞搞震，同AV仁夾計耗公帑、亂政局，認真害港不淺。
