公共醫療問題多 點止門診預約難

呢，有關注組織針對基層家庭醫療狀況做咗一項調查，超過八成半受訪市民認為公營門診未能滿足醫療需求，七成人認為難預約，逾半人指門診名額不足。調查仲發現，電話預約門診嘅受訪者，近一成要打十次以上至成功，超過兩成三因為難預約而主動放棄。另外，超過三成人有傷有病都唔睇醫生，超過一半兒童焗住幫襯私家診所。

話時話，公營門診難預約，輪候時間長，早就唔係新聞，最令人谷氣嘅係，當局明知未能滿足市民需要，但就一直唔肯改善，導致問題不斷惡化。好似最近咁吖，適逢冬季流感高峰期，加上禽流感等疫症虎視眈眈，搞到逼爆醫院。淨係前日咋，公立醫院急症室求診個案就超過六千六百宗，逾千宗經急症室轉入內科，結果連內科都逼爆，病床佔用率超過百分之一百，喺咁嘅情況下，公立醫院點可能維持正常服務吖？輪候時間又點可能唔愈來愈長吖？

公共醫療服務不足，最大受害者係老人家。係人都知，老人家對醫療需求最大，偏偏公立醫院問題多多，搞到佢哋無所適從。早前有調查發現，超過八成受訪長者指醫管局普通科門診難預約，電話預約名額經常爆滿，平均撥三次至接通一次，有人焗住轉睇私家醫生，有人就索性放棄治療，寧願服用成藥。你話嘞，港府係咪虐老吖？

冰凍三尺，非一日之寒，公共醫療千瘡百孔，服務每況愈下，歸根究柢係因為港府欠缺承擔，尤其係前朝政府食衞局局長周一嶽任內，更加烏煙瘴氣，問題不斷惡化。其實，港府撥畀醫管局嘅資源都唔算少嘅喇，弊在管理混亂，分配不公，肥上瘦下，導致前線醫護人手不斷流失，十個煲七個蓋，想唔出事都幾難。

好明顯，公共醫療百病纏身，已經成為民怨源頭之一，當局唔諗辦法改善管理，消除亂象，反而一味推銷所謂自願醫療保險，企圖將市民推往私家醫院，簡直係本末倒置。即係咁，有頭髮冇人想做瘌痢，如果病人負擔得起，邊個唔想去私家醫院吖，自願醫保唔係話唔得，但首先要搞好公立醫院，同埋監管好私家醫院，如果唔係，盞添煩添亂咋，叮！