少膽虫身為《爛果》腦腫，返工無嘢做相當正常。你問我成日百無聊賴怕唔怕腦細見到？話你聽，如果扮忙係一種藝術，少膽虫就一定係史上最偉大嘅藝術家。好似今日咁，少膽虫就歎咗全日報紙嘞！雖則《爛果》內容全屬創作，但當小說咁睇，個觀感就fit晒！

正當少膽虫睇得如癡如醉，耳邊突然傳嚟一聲熟悉嘅怒吼︰「少膽虫你又蛇王！」淫賤黎邊嗌邊摑埋嚟，少膽虫為求自保即時解畫︰「腦細息怒！我睇報紙係想檢查吓邊度作得唔夠好咋。」雖然呢個解釋情理兼備，但都阻唔住淫賤黎呢一巴，「啪！」

「嗚呀！我哋報館嚟，睇報紙有乜問題。」少膽虫忍唔住喊出嚟。「你有冇常識？單車館外都唔畀踩單車啦，報館點會畀睇報紙。」淫賤黎跟住問，「依家你蛇王斷正，有乜解釋？」見少膽虫低頭不語，淫賤黎又問︰「做乜粒聲唔出，知衰呀？」「我、我學康文署，不解釋。」呢個答案換嚟嘅，當然係「啪啪啪啪啪啪啪啪啪啪」。

第一手消息請下載on.cc東網iPhone/iPad/Android/Windows Phone Apps