潮語「偽人」並唔淨係指虛偽嘅人，而係指一啲甘為金錢利益同名氣而親政府嘅藝人，或娛樂圈中人包括幕前同幕後。佢哋呢班「偽人」會不時喺微博或Facebook發表一啲撐政府或愛國嘅膠論，每次都會被大批網民抨擊，其中一啲例子包括屢發一啲低能程度媲美大陸五毛言論嘅過氣男星，又例如曾取笑別人下體細小嘅爛片電影導演。當然還包括愛國愛到無邏輯嘅膠論之王某「高」人。

今年因為停牌關係，少咗揸車，導致到少咗聽收音機。依家有咩新歌都係靠面書或YouTube認識。所以，今年真係唔知有咩新歌手新歌。加上雨傘運動爆發，全年有兩個幾月完全沒有心情聽流行曲娛樂，聽得最多嘅除咗係關於雨傘運動嘅歌，就係Beyond二十年前嘅作品「海闊天空」。講開又講，查實呢兩三年樂壇其實都冇乜歌值得聽，除咗謝安琪、陳奕迅仲會聽吓之外，其他都係聽咗等如無聽。唔知幾多年冇留意過甚麼樂壇頒獎典禮，因為嗰啲都係疑似唱片公司同娛樂霸權嘅分贓大會，完全反映唔到音樂人同歌手嘅努力。不過，今年某個樂壇頒獎典禮，竟然多咗好多觀眾。原因係「雨傘運動」嘅「主題曲」之一「撐起雨傘」竟然被網民投票推到去「我最喜愛歌曲」最後五強。呢個獎標榜由樂迷普選產生，最後五強由頒獎禮當晚現場一人一票選出。結果「撐起雨傘」以二千八百八十七票贏得獎項。喺呢個全城政治化白色恐怖嘅時代，台上竟響起呢首社運之歌，現場更有觀眾打開雨傘以示支持。台下有歌手拍手和唱，但亦有「偽人」打呵欠冷眼旁觀！

香港到底有幾多係「偽人」？有幾多係藝人？不得而知。但如果你相信婊子無情、戲子無義的話，長年累月以假面搵食嘅人，點可能要求佢哋真？

第一手消息請下載on.cc東網iPhone/iPad/Android/Windows Phone Apps