政壇：密會戴耀廷朱牧 肥佬黎又攪局？
「佔領行動」早前以泛民主派成員齋坐「博拉」落幕，有份策動佔中嘅香港大學法律系副教授戴耀廷早前匿名捐款予港大唔同院校同學系引起爭議，近日更獲港大校務委員會「放生」，加上突然獲批本月中開始休假半年，引起全城嘩然。就喺戴耀廷放假前夕，被指係佔中幕後黑手嘅壹傳媒集團前主席黎智英（肥佬黎）又搞飯局，戴耀廷同另一佔中發起人朱耀明竟然都係座上客，認真耐人尋味。
陳日君（前中）離開時仍然同肥佬黎（前左）雞啄唔斷。
朱耀明（左）同戴耀廷（右）飯後齊封嘴，拒絕回應飯局傾咗啲乜。
肥佬黎（背向鏡頭者）傍晚同李漢奸（右）一同乘座駕到雲咸街上樓晚膳。
肥佬黎自從金鐘清場被捕後相當深閨，早前更赴日本旅遊避世，但估唔到回港後冇耐就急不及待要約飯腳攪局。尋晚近六時，肥佬黎由何文田寓所乘座駕，先直駛往外號「李漢奸」嘅民主黨創黨主席李柱銘位於馬己仙峽道寓所會合，二人隨即到中環雲咸街一個御用飯堂晚膳。
李漢奸陳日君同為座上客
正當大家以為係肥佬黎同李漢奸嘅二人攪局飯敍，食足兩小時後帶頭離開餐廳嘅竟然係戴耀廷，緊隨其後嘅仲有朱耀明同「搞事四人幫」另一成員、天主教香港教區前主教陳日君等人，換言之今次至少係五人飯局。
五人中只有戴耀廷同朱耀明承認同眾人飯敍，對其他問題就笑笑口「封嘴」，行多兩步仲「解體」各自離開；肥佬黎同陳日君離別時仲喺大廈外雞啄唔斷，真係唔知邊個度橋畀對方至真。
不過講番五人飯局嘅時機，佢哋趁政府遞交民情報告予港澳辦、政改第二階段諮詢，以及施政報告公布前夕再聚頭，唔知佢哋係咪又密謀有新一輪攪局，甚至乎係新一波佔領行動，講到底都係疑團多多，耐人尋味。
