政壇：基廣會執位無聲勢
持續七十九日嘅佔領行動告一段落，唔少人都話禍源之一係政府推廣《基本法》不力，搞到唔少青年人只識「兩制」、唔識「一國」，由政務司司長林鄭月娥擔任主席嘅基本法推廣督導委員會（基廣會）成為眾矢之的，適逢今年四月四日係《基本法》頒布二十五周年，據聞政府較早前低調委任至少四名親建制人士加入基廣會，包括港區人大代表黃友嘉等人，原本委員兼公開大學校長黃玉山等就交棒，退下火線。有人話，依家風頭火勢下，基廣會執位都係靜雞雞，真係唔知佢哋第日點樣強化推廣工作嘞？！
設計圖片及對白
基廣會負責向政府建議推廣《基本法》嘅工作，近年較為熟悉嘅工作，首推政府喺去年初以基廣會名義，邀請基本法委員會內地委員饒戈平來港出席研討會，期間林鄭仲話饒戈平言論起咗「一錘定音」效果，惹來失言風波。
擬招青年參與周年慶
基廣會一如去年般會動作多多，消息指，基廣會最近密密開會籌備《基本法》頒布二十五周年嘅一系列活動，據知初步會大搞啟動禮，邀請內地嘉賓來港出席研討會，又會舉辦大型問答比賽、展覽等，有人仲建議搞基本法大使計劃，招攬一班青年人參與埋一份。
除此以外，基廣會最近亦低調換人，官方網頁去年底更新委員名單，黃玉山、油尖旺區議會副主席高寶齡等人卸任委員，取而代之係黃友嘉、基本法委員會委員莫樹聯、城市大學法律學院前院長王貴國等人，黃玉山呢邊啱啱卸任，尋日已經喺電台節目中大談青年人應該點理解一國兩制，又話香港問題唔止係「香港問題」，更加係「中央問題」喎，唔知學聯同學民思潮等團體搞手聽唔聽到呢？
