新年一到加聲起 誰憐民生步步艱
新嘅一年，本來應該帶來新希望，可惜今年認真麻麻，好消息就冇喇，壞消息卻不絕於耳。嗱，上海除夕倒數發生人踩人意外，三十幾人遇難；而本港就受到禽流感威脅，除夕撲殺咗近兩萬隻家禽，簡直係雞犬不寧。至於關乎港人切身利益嘅民生問題咯喎，更加係加風四起，醫、食、住、行無一幸免，基層市民睇怕今年都幾難捱咯。
唔係吹水o架，啱啱踏入二○一五年，加風就撲面而來。中華電力元旦起加電費百分之三點一，受影響商住用戶超過一百五十萬；餐飲業界就表示，經營成本不斷上升，薪酬租金食材樣樣貴，焗住要加價百分之五至八。
外出用膳固然要畀多啲，搭車或者自己揸車同樣要大破慳囊。元旦起全港有十九條專線小巴線加價，最多每程加一元。私家車主亦走唔甩，全港一百三十個公屋停車場尋日起加租百分之四至八。
人有三衰六旺，大吉利是講句，萬一有乜頭暈身慶，去私家診所或醫院求診，同樣要畀多啲。有連鎖醫療集團宣布，由下禮拜一開始，西醫普通科診金平均上升約百分之七；另外一家私家醫院嘅分娩套餐，今年起更加價兩成添，問你點頂！
一句講晒，同市民日常生活有關嘅幾乎樣樣都加，弊在打工仔薪酬增幅似有若無，此消彼長，你話係咪愈窮愈見鬼吖。講真，香港樓價同租金之高已經冠絕全球咁滯，家陣同民生息息相關嘅物價又飆到離晒譜，市民無法安居樂業，社會想唔亂都難喇，唔怪得佔領行動陰魂不散。
古人有話，治國之道，富民為始。要解決深層次矛盾，消除民怨，最有效辦法就係解民於困苦，針對貧窮問題落重藥，可惜吖，身為政府大掌櫃嘅財政司司長曾俊華依然一毛不拔。係人都知，鬍鬚曾計錯數當食生菜，年年都多估開支少估收入，但前排竟一反常態，預測未來三年「年年有餘」喎。咪以為佢轉性吖，鬍鬚曾隻字唔提點樣善用盈餘扶貧紓困，反而一味強調審慎理財，量入為出，孤寒財主本色一啲都冇變。
咪話太一叮唔提醒，通脹殺到埋身，港府守住金山銀山，漠視基層苦況，民怨不斷積聚，遲早爆煲嘅咋。如果鬍鬚曾嘅新財政預算案再冇料到，唔推出濟貧措施，盞進一步激起民怨o架，叮！
