名媛Margaret邱李茂琪同老公邱子傑及一對子女前晚出席一個除夕派對，Margaret以一身白色示人，佢話：「配合番大會主題，今次係玩色，金色、白色同藍色。」佢喺外國留學嘅囝囝特別返港度聖誕，問到囝囝習唔習慣喺外國生活？佢笑言：「應該係我開始習慣佢喺外國讀書，佢讀得好開心，佢好鍾意間學校。囝囝農曆新年冇假放，我無所謂，最緊要聖誕節有假放，對我哋嚟講聖誕係大節，佢今次返嚟兩星期。」至於新年願望，佢希望大家健康開心。

邱李茂琪一家人都好重視聖誕節同新年，必定一齊度過。

孫大倫（中）三代同堂參加除夕派對。

被問到有乜新年願望？李依琳話仲未諗好。

同場見到九巴新抱雷林靜怡同老公雷兆光及三名子女，雷林靜怡話新年願望係大家身體健康，唔開心嘅新聞遠去喎。轉頭見到孫大倫同太太、兒子孫道熙同新抱林珊亭，林珊亭話依家懷孕六個月，已知係女兒，仲直言心情非常開心興奮。

扒女Elaine李依琳同爸爸李德麟、胞弟李浩森同女友都有嚟到。Elaine話男友Conrad郭翰平早就到場，但對方因打籃球而腳部受傷，佢話：「佢傷及舊患，已經做咗兩次手術，仲要多五個星期先可以行到。」至於新年願望？佢話仲未諗好。咁願望係咪結婚呀？佢笑住否認。

第一手消息請下載on.cc東網iPhone/iPad/Android/Windows Phone Apps