城中鏡：吳亮星除夕夜孤寂
沙田馬場尋日舉行元旦賽馬日，唔少馬迷入場落番幾注碰碰運氣，唔少城中名人都帶埋親友一齊入場感受氣氛。立法會議員吳亮星罕有地同老婆拍拖入場，支持佢哋有份嘅團體馬。講到除夕夜點慶祝時，星爺自爆太太唔畀佢出去，驚佢咳嗽情況加重，但係太太就約咗朋友出去玩，結果星爺獨自一人喺屋企倒數跨年，認真陰功。
吳亮星（左）罕有地同太太拍拖入馬場。
鄧振豪（左）同太太Giselle祝願大家身體健康。
施榮忻盼政府早啲解決民生問題。
患感冒留家倒數
早前我哋講過，星爺喺佔領期間患上感冒，至今仍然未清，自嘲正處於「後感冒時期」。星爺話太太驚佢除夕夜出去人多擠迫嘅地方，空氣唔好會令咳嗽情況加重，於是佢就留喺屋企。咪以為佢同太太齊齊在家倒數一樣咁甜蜜，其實太太約咗一班朋友去「九龍蘭桂坊」（即諾士佛臺）慶祝，星爺惟有獨自留在家中。幸好佢屋企喺中環，窗外望到維港煙花，一樣咁享受。講到新一年嘅願望，佢話最緊要工作順利、社會安定。
佳能香港副總裁鄧慶治兒子Chandler鄧振豪同新婚太太Giselle都有入場，已有一個囡囡嘅佢哋今年似乎要忙住湊B，未來一年都唔會急住追多個，希望大家都身體健康、快快樂樂。百仁基金前主席施榮忻就話，新一年希望社會積累嘅民生問題早啲解決，例如多啲興建房屋租畀年輕人咁話。
中華廠商聯合會新上任的副會長戴澤良同太太羅台秦、副會長吳清煥等人拍住入場為出賽馬匹打氣，結果馬匹跑第四名，眾人皆喜出望外，事關佢哋希望馬匹留喺第四班，結果有錢收又唔使升班，開心晒。
