新嘅一年開始，記者返工就撞到食環署署長群群，記者立即同群群舊事回顧，一齊睇吓佢哋講乜。

記者：唉，你哋「叻」啦，排第一名……

群群：第一咁好？係咪清潔方面做得好？

記者：係我哋過去一年接獲近三萬宗市民嘅投訴，你哋以逾二千七百宗冠絕所有政府部門，攞咗個第一名返嚟呀！

群群：……舊時啲嘢唔好提啦，都開始咗新一年喇……

記者：就係要同你講，等你今年做好啲！

群群：放心啦，有我顧全大局，一定冇問題嘅！

記者：態度積極，算你啦……

群群：皆因今日係新一年嘅第二日，唔會咁黑仔就有投訴嘅，即係到依家都係零投訴啦！呵呵！

記者：唔知醜你就真係第一喇！

第一手消息請下載on.cc東網iPhone/iPad/Android/Windows Phone Apps