政壇：港台有份玩 施政財案論壇

話說各電視台喺發表施政報告同財政預算案當晚都會舉行論壇，邀請特首梁振英同財爺曾俊華列席解說報告重點。舊年新增電視頻道嘅港台曾表示想加入埋製作團隊，派員出席兩個論壇，但係有電視台對此表示異議，最終港台冇份參與。

一年好快就過去，聽聞港台同各間電視台傾得差唔多，總算畀佢哋恨到。我哋問過港台，佢哋證實可以派人出席兩個論壇，負責統籌各間電視台嘅政府新聞處亦承認，港台新聞部可以參與主持同輪流製作兩個論壇。至於被指舊年反對嘅無綫電視就話，以往都係由各電子傳媒派出新聞部人員組成「聯合製作群組」，如果港台派出「新聞部人員」加入，就唔會反對喎。