九巴轉乘扣錯錢逾月未退款

九巴免費轉乘變收取全費，乘客投訴逾月竟未獲受理！家住馬頭圍道的梁先生每天均乘搭九巴61X線，並於屯門公路轉車站免費轉乘66X往屯門大興上班，惟早前轉車時發現被收全費，向九巴投訴逾月仍未獲處理，「我打去登記晒啲資料，啲職員叫我等十日，之後又叫我等多十五日，結果依家等咗個幾月佢哋都未有人覆我！」

梁先生早前乘搭61X線轉乘66X時未獲免費轉乘優惠，直至投訴後才獲處理。

九巴發言人證實，根據顧客八達通卡紀錄顯示，梁先生由61X線轉乘66X線時未能享用轉乘優惠，九巴顧客服務部已致電梁先生解釋調查結果及安排退款，發言人就事件對事主帶來不便致歉。

「本來就係佢哋收錯錢，依家仲要搵《太陽》投訴佢哋先覆我，真係好過分！」梁先生批評九巴無視乘客投訴，要求運輸署加強監管公營巴士服務，避免再出現「收錯錢」情況。