城中鏡：鍾意遊世界 王石拒移民
退休之後移民外國歎世界，係唔少人嘅夢想，萬科企業嘅董事長王石都成日周圍去遊學，之不過一問到佢打唔打算移民，佢就堅決咁say no喇，仲好有型咁話：「我是中國改革開放的受益者，要有擔當，跑了算甚麼？」
王石鍾意探險，至今佢仲係中國成功攀登珠峰嘅最大年齡紀錄保持者。（資料圖片）
作為呢間全球最大住宅開發商嘅領軍人物，王石相當特立獨行。佢喺正值「年富力強」嘅時候，突然辭任集團總經理一職，走咗去登山探險，迄今佢仲係中國成功攀登珠峰嘅最大年齡紀錄保持者添，睇到班股東又嬲，又不禁佩服。
王石出名鍾意探險、周遊列國，近幾年仲去埋哈佛、劍橋留學。不過，有記者問佢會唔會移民時，佢就回應話：「我不移民。我的事業在中國，我在國外指揮，高管會怎麼考慮呢？」
記者咁問都係因為王石曾經講過對自己中國企業家嘅身份有啲焦慮，覺得冇乜安全感。之不過，王石今次就話自己係既得利益者，要有擔當，「真有不安全感的話就更不能走，跑了算甚麼？」
