城中鏡：趙式和為藝術搬舖
趙世光與何琍琍嘅女兒趙式和從小醉心藝術，二○一○年喺灣仔開設畫廊，近日將畫廊搬到上環一處更大嘅地方，而原有喺灣仔嘅畫廊就改成life style store「Maison Huit」。點解喺瘋狂租金氣候下仍冒呢個險？佢話：「之前嗰度地方太細，show唔到更大嘅畫，有啲藝術家要特登畫細幅啲嘅畫就番我哋，所以依家搬去兩層二千五百呎，地方大咗好多。」咁點樣收支平衡？佢話下年真係要搞多啲展覽，同埋要再勤力啲去畫展，希望帶多啲好作品畀大家。
趙式和愛好畫畫，收藏嘅畫作累積咗五百幅。
灣仔畫廊擺滿了各式各樣嘅藝術品。
計劃安排畫家演講
式和話其藝術細胞可能嚟自家族遺傳，爺爺、嫲嫲、父母都喺唔同嘅藝術範疇上有研究，而佢從幼稚園開始就愛上畫畫，素描、水彩、油畫同陶瓷等，長大後更開始收藏畫作，至今累積五百幅，多得要擺放在倉，最貴嗰幅成五百萬元。問到老公可有阻止？佢笑說：「佢都冇乜阻止，因為從生意角度係幾好嘅投資……有時唔夠錢買都會問daddy借，但每一次我都會還晒畀佢，冇錢就兩、三萬咁還，有就還多啲，依家已經全部還晒，我好proud of自己。」
收藏乜嘢題材嘅畫？佢話有開心、有沉重，每一幅都唔同，最近就買咗一幅畫家自畫吃完嘅碗筷，被老公質疑價值何在？佢認為每幅畫作都有其含意，咁亦係好個人嘅感覺，佢計劃安排畫家來演講，希望可以將藝術訊息帶畀港人。
