城中鏡：菁英聖誕好有禮
每年都搞聖誕派對嘅香港菁英會，今年大玩收集禮物，每位來賓要做一晚聖誕老人，帶份禮物入場「上繳」大會。不過，收集禮物唔係用嚟搞大抽獎，而係送畀低收入家庭小童，真正與眾同樂。
梁宏正（右）、菁英會榮譽主席洪為民（中）同副主席林凱章（左）帶禮物入場響應送禮行動。
菁英會女將齊齊大變身，王文博（左起）、曾鳳珠、鄭燕華、彭芷君、張詩培、顏麗儀同傅明憲盛裝出席。
盛品儒（左二）嘅未婚妻蔡一鳳（中）加入菁英會，金至尊數碼行政總裁吳傑莊（右二）、楊華勇（右一）同會員陳緯邦（左一）齊舉杯歡迎。
入場即搵收集箱
今次派對由新出爐嘅十八期菁英同學揸旗，主題係「菁英十八變」。話明要變身，大會預備大量假髮、假鬚、頭套同面具，方便賓客入場前「快速變面」。不過，一眾菁英會友掛住「送禮」多啲，紛紛查詢禮品收集箱喺邊。籌委會主席黃司政話估唔到反應咁踴躍，一晚收集到逾二百份禮物，並已喺日前將禮物送到將軍澳區嘅低收入家庭。
當日晚宴抽獎環節最熱鬧，最幸運係抽中三獎嘅菁英會榮譽主席Johnny楊華勇，見佢打開信封一刻，露出難以置信表情。原來佢抽中嘅就係日前提過嘅雙人來回沖繩商務客位機票。不過，中獎信上面只寫上「xx航空」送出幾個字，Johnny笑言寫得咁簡單，怕兌現唔到喎，但係佢依家反而驚日本嘅輻射多啲囉。
菁英會員一向背景厚，十八期會員都有名人二代，包括莎莎國際主席郭少明次女郭詩雅，依家喺公司擔任業務發展總監。仲有明年將與亞視前執董盛品儒結婚嘅蔡一鳳。蔡一鳳因為太忙，笑言已將婚事交畀未婚夫話晒事，印印腳等做「盛太」。菁英會主席梁宏正就話會繼續招攬年輕才俊入會，又會主動多同青少年接觸。
