政壇：搞搞政：吳得掂搭馬航騰騰震
馬來西亞航空同其廉航亞洲航空，接連有客機失蹤或被擊落，令人心驚膽戰。早前被立法會議員提出質詢、批評頻頻外訪嘅教育局局長「吳得掂」吳克儉，據聞會喺《施政報告》發表前一個星期再去外訪，而且仲係搭馬航添，令佢驚到騰騰震。
設計圖片及對白
話說吳得掂下周三去東盟大國之一嘅馬來西亞，一連兩日拜會當地教育部，又會去當地大學演講。至於點解揀搭馬航呢？據悉佢向來訂開國泰航空，但因航班時間唔夾，要佢喺馬國留多一晚，為咗費事被人話佢用多一日納稅人金錢，所以焗住改搭馬航，早機八點鐘出發，晚機十一點鐘返港。
擬搞「印尼周」打好關係
據講佢內心有掙扎過，唔知去唔去好，近日仲重新考慮去唔去添。不過，當知道馬國方面盛意拳拳，一早準備晒啲嘢，佢都無謂為咗少少風險而推卻，所以最終都係決定如常展開旅程。
點解對馬國咁情有獨鍾呢？據了解，佢對東盟國家發展一日千里，一直都好想同呢啲國家喺教育方面建立關係。好似有二億多人口嘅印尼，係東盟人口最多嘅國家，佢曾多次拜訪當地，認為當地好多尖子去咗日本東京大學、新加坡國立大學等頂尖學府，但其實香港都可成為佢哋其中一個選擇，所以多次走訪當地。
據知教育局近期會安排印尼中學同香港中學結成姊妹學校，仲搵埋保良局拉線，邀請當地中學來港簽訂諒解備忘錄，局方仲諗住大搞一場「印尼周」添！另外，吳得掂仲對人口第二大國印度有興趣，下一步就諗住訪問印度。雖然吳得掂對教育好有心，外訪亦係為咗香港嘅長遠教育，但咁樣就好難洗脫經常外訪嘅形象，都係嗰句，每次外訪公幹，係咪真係需要局長親自出動呢？
