政壇：四成人工捐社總 阿柱冇錢入私院
話說立法會社福界議員張國柱喺十月底時，證實患上惡性胃黏膜淋巴瘤，隨即向立法會請假，接受兩個月治療同休養。阿柱話十一月底完成咗二十四次放射治療後，下月會再做身體檢查，情況樂觀。佢又話咪以為做議員好有錢，其實每個月要捐四成人工畀社會工作者總工會，所以冇能力支付私家醫院昂貴醫療費，私院一次療程二十萬元實在難以負擔，只好去公立醫院治療。
張國柱睇落面色唔錯，睇嚟中西醫雙管齊下都有啲效用。
阿柱依家同時睇緊中、西醫，雖然西醫話佢唔需要戒口，但中醫就建議佢戒蝦、蟹、雞、鵝，甚至連燕窩都唔可以食，因為燕窩含有豐富嘅蛋白質，唔適合佢嘅身體狀況。佢承認自從患病後，體力冇以前咁好，惟有靠中藥同湯水固本培元喇！另外，佢喺聖誕期間同家人去咗廣東省連南玩，佢話喺香港比較大壓力，所以要趁假期親近大自然，放鬆下緊張嘅心情喎。
