政壇：黃宓芝公司上市獲贈Henna
科勁主席黃少華同囡囡Gigi黃宓芝都係公司執行董事，佢尋日露面嗰陣，記者發現佢對手整咗近年好興嘅印度彩繪Henna。佢話前排去咗印度參加印度同學嘅婚禮，個同學知佢公司搞上市，就幫佢畫Henna祝福佢。
黃宓芝之前去咗印度出席婚禮，仲整咗Henna。
Gigi好驚其他人以為佢走咗去紋身，所以尷尷尬尬咁收番埋對手。其實Henna唔係紋身，係當皮膚係畫紙嘅印度傳統藝術，象徵好運o架。講得興起，Gigi仲話去印度出trip，就順便睇吓有冇拓展機會，話公司都想打入新興市場喎。
唔講唔知，原來Gigi仲讀緊書，喺香港遙距讀EMBA課程，就識咗飛嚟香港讀書嘅印度同學。Gigi入咗公司八年，直至前年先升做執董，年僅三十一歲嘅佢仲拖低晒管理層平均年齡。年輕係佢最大本錢，佢話自己年資短，要喺學業上努力吓，趁公餘進修，預計一六年就畢業，到時繼續幫公司。佢仲好認真話EMBA課程係自資，唔係公司贊助嘅。
