政壇：張耀堂仗義再掌八達通
近日收到一個震撼消息，farewell冇耐、今年三月先榮休嘅八達通前CEO Sunny張耀堂出山重掌八達通，放埋幾日假，今個星期五正式返工。
張耀堂樣子年輕，睇落完全唔似到退休年齡，相信出嚟做多十年八年都無問題。（資料圖片）
支付界人才一向渴市，高層來來去去都係Visa、萬事達、銀通同八達通換位，遇着有人退休或轉行，都咪話唔頭痕。上年喺八達通做CEO嘅Sunny宣布退休，Last Day一推再推，直至等到八達通幾經辛苦由萬事達請咗Kevin高敏德返嚟，Sunny先正式榮休，點知Kevin做咗唔夠七個月就閃辭，搞到呢兩個月八達通又要周圍敲門挖角。
行內人有理由相信，八達通打盡人情牌兼銀彈盡出，先請到Sunny出山。Sunny退休生活多姿多采，除咗同朋友家人坐吓郵輪出國，閒時又會打吓高球，不知幾引人羨慕，今次重返舊公司做CEO認真夠義氣，相信佢可以帶領八達通再闖高峰。
好似Sunny喺金融界打滾幾十年，又有豐富支付公司經驗嘅人才，喺行內搵嘅話，十隻手指數得晒，好似銀通老臣子曾憲求咁，據聞舊年已經提出話想退休，但銀通今個月先成功搵到環聯信貸資料庫蔡炳中過檔接棒，所以話支付界請人不易呀！
